(Con ilustracións de Fernando Babío)
Sinopse

Os poemas deste libro transitan entre a tradición, sempre de dobre raíz, culta e popular, e a contemporaneidade, un espazo por definición fuxidío. Son poemas empeñados, asemade, en achegar a necesaria música á pescuda das emocións, e vano facer botando man de recursos como a métrica e a rima; é dicir, acolléndose coa confianza dun artesán á protección dos límites. O resultado é unha poesía de estirpe deliberadamente figurativa. Á fin, ademais de álbum e partitura, este libro quere ser o mapa para un camiño que ten como Norte o corazón de cada quen: esa estrela.
(Con ilustracións de Fernando Babío)
(Con ilustracións de Fernando Babío)
Críticas
“Madurez, riqueza léxica, dominio expresivo. Estas son, entre outras, as virtudes que adornan Estrela do norte. Mais quizais, sobre todas elas, a fulguración da saudade, o verdadeiro núcleo vertebrador de todo o seu discurso poético. Unha nostalxia que é, a un tempo, alegre e triste, serena e rabiosa, acusadora e bondadosa, tenra e reivindicativa”.
Román Raña. Faro de Vigo
“Confirma a solidez dunha traxectoria que non procura novos camiños, senón que reitera varios fíos xa recollidos polo autor con anterioridade, mais sen por iso caer de ningunha maneira na repetición e no eco de si mesmo, na procura de modulacións novas”.
Miro Villar. Grial
“Mergullarse nestes poemas é ollar en fite a alguén que espreme a vida, que sabe o que hai de bo nela para balizar ante nós un itinerario de experiencias, como se fose un deses faros que o cativan tanto, luz na natureza, pero tamén na escuridade da que saímos moitas veces grazas a todo ao que o poeta lle rende tributo. Toda unha oración polos dons”.
Ramón Rozas. Diario de Pontevedra
“Cartas mariñas, bivaques de memoria e cómputos vitais nun estourar de suites, sonatas e muiñeiras que tenta atrapar os acordes e as estridencias dunha vida ora harmónica ora cacofónica, unha auténtica banda de Moebius onde todo vai e vén nun bucle complexo, espiral e labiríntico”.
Armando Requeixo. El Ideal Gallego